Bärgfrüehlig
Jakob Ummel
- F -
- 1 -
Der Früehlig stygt uf d'Bärg juhee,
rumoret i de Flüehne.
Macht aaber bis zum Firneschnee,
laht Weid und Trift ergrüene,
laht Weid und Trift ergrüene.
Er schält de Tanne d'Chnoschpe'n us,
trybt Ahorn, Lärch und Bueche.
Was läbt im dunkle Bodehus,
schickt er gah d'Heitri sueche.
- 2 -
Der Früehlig stygt uf d'Bärg juhee,
macht troch um Spier und Hütte.
Macht ds Wasser klaar i Brunn' und See,
tuet s'wäge no erstrütte,
tuet s'wäge no erstrütte.
Und geit de mit sim warme Huuch,
vo einer Alp zur andre,
tuet allne Blueme d'Aeugli uf,
laht d'Tierli alli wandre.
- 3 -
Der Früehlig isch im Bärg juhee,
me merkt's em Volch, am Bode.
Der schüchscht Aelpler laht sech g'seh,
der süümigsch tuet sech rode,
der süümigsch tuet sech rode.
Im Sennegschirr wird Umschau gha,
me rüschtet voller Freude
der Tross mit allem Drum und Dra,
zur Fahrt uf d'Alpeweide.