1929 Jodlertag in Interlaken

Dr nünt Juni isch vor der Tür.
Was Donners chöi mir da derfür?
Uf Interlake muess me's houe
u dert der Kursaal chly ga gschoue.

Sälb z elft tüe mir de uecherytte,
mit Bahn u Schiff, ganz unbestritte,
wir haben auch noch Weibsgebilde
in unserm wunderbar Gefilde...

Das Schiff isch voll, fasch zum Verheie,
wenn's nume nid tuet ungergheie!
Süsch Jodler, chöit Dir de statt singe
ir Thunerglungge umeschwümme.

Ar Ländti z Interlake obe
isch alles zwäg u unverschobe.
Tipptopp isch's organisiert,
Empfang u Gruess isch usprobiert.

Dr Lötschberg-Wirt, das Unikum,
schteit o zmitts im Publikum;
Mit sym grosse Parisol
Kennt me ne us tuusig wohl!

Er tuet üs schneidig de begrüesse
zämehädlige mit Füesse:
Mir schö grad Richtig Lötschberg y,
mir ghöre nämlech grad dert dry.

Mir tüe de dert es Liedli singe,
für z luege wie mer's chönne bringe;
öb's fähig syg für d Kursaalrichter,
für's dürezla dür ire Trichter.

Mir zottle druuf em Kursaal zue,
e jede het scho jitz bald gnue
und dänkt, we nume de bim Cheib
di ganzi Gschicht nid abverheit!

Dir Herre, jitz heisst's: fasset Muet,
uf mit em Gring, de chunnt's scho guet.
Es wär mer de bim donner lieber
we ken chunnt mit Lampefieber.

Die Schicksalschtung het gschlage schon,
mir schtöh jitz uf der Bühni vorn.
Vor zirka 70 000 Chöpf
teils ohni, und teils no mit Chröpf.

"Abschied vom Bärg" wird vo üs gsunge,
het zum Verwundere guet klunge,
alli Lüt sy ganz erchlüpft,
dä "Abschied" isch schön füre tüpft!

E Konkurränz vo syner Zyt,
är hocket gar nid cheibe wyt,
het nachhär zue mer übere gglacht:
Dir heit bim Donner Fortschritt gmacht!

E jedem het de ds Ässe gmundet
am grosse Tisch im Lötschberg unde.
Doch mit em Fleisch?! Sött's zwar nid säge,
i la's jitz äxtra ungerwäge...

Dass me ja het Hunger gha
das isch ja mond- u sunneklar.
Mir hei die Sach de zämebrätschet,
was nid isch gange het me ggchätschet!

Am Namittag proformahauber
hei mir gsunge ehrehauber,
für z zeige, mir chöi de no eis
Jodelliedli, dass's jitz weisch.

D Spielbank sy mer de gah gugge,
zwe hei enangere uf der Mugge.
Dr Gwinner jedoch blybt ganz lässig
im Gägeteil dr anger hässig.

Bir Heifahrt ufem Thunerschiff
chunnt Bichsel Fridu grad a Kniff.
Präzis chunnt er grad vis-à-vis
zu zwöine Chrabi, schick Di dry!

Dr Bühlmann Chrigu ganz persee
het die fatali Gschicht o gseh.
Und will ja irere zwo dert sy
so setzt sich är o vis-à-vis.

Ougeblicklich grad e Schatz
's isch gar nid sone dumme Fratz.
Zwar isch si jitz grad ohni Zäng,
das macht dr Chatz dr Buggel z läng!

Bim Bichsel sy nid ärnscht Absichte
wie mir us allem ghöre brichte.
doch ds Gägeteil isch's hütt bi Chrischte:
Verliebt, verlobt, und zäme nischte!

Dr Schlussakt sch deheime gsy
bim rote und bim wysse Wy.
U jedes wo isch mit üs cho
het sicher no hütt e chly dervo...